Xoves de arte e didáctica
Encontro mensual de formación en liña
Pese ao enorme reto que supuña organizar unhas xornadas didácticas telemáticas por mor da COVID, parece que foron un éxito rotundo. As achegas que recibimos a través do formulario de avaliación foron moi positivas e o ánimo que respiramos ao remate das xornadas foi de recuncar.
Por esta razón, decidimos iniciar un novo formato de formación e continuar organizando pequenos encontros en liña. Serán charlas breves e dinámicas cun pequeno debate que organizaremos regularmente o primeiro xoves de cada mes entre setembro e xuño. A idea é facer unha presentación de 40 minutos e deixar 20 minutos para preguntas e coloquio, de xeito que o encontro dure aproximadamente unha hora. Ao igual que as recentes xornadas faremos estes encontros a través da aplicación de Falemos.
O vindeiro xoves 3 de xuño iniciaremos este ciclo de encontros as 19:30 co noso compañeiro Paulo Porta, falando sobre “A cuadratura do círculo e outros cálculos xeométricos”. Convidámosvos a participar!
